U sred smo vrelog talasa koji zapljuskuje našu zemlju, a ko nije osjetio vrelinu podgoričkog asfalta, u ljetnim danima, ne zna o čemu govorim. Trenutno je preko 40 stepeni celzijusa, asfalt gori, a ja sanjam niže temperature i hladnije noći, gdje imam tu mogućnost da se pokrijem. Jer pokriti se tokom noći u Podgorici, u ovom periodu godine, je nemoguća misija. Naravno, ukoliko ne spavate pod klimom, što ja ne praktikujem.

Sanjam o prirodnom, hladnom vazduhu, koji prodire u moju sobu i čini da se tako lijepo i prijatno ušuškam u svom krevetu. 🙂

Visoke ljetnje temperature su idealno vrijeme kada možemo naš organizam staviti na prirodan proces detoksikacije. Usresrediti se na laganu hranu, hranu koja hladi naš organizam i pomoći mu da svoje fiziološke procese eliminacije nagomilanih toksina obavlja nesmetano.

Kada sam razmišljala kakvi recepti bi nam svima koristili u ovom periodu godine,  shvatila sam da su to ona brza zdrava jela, puna svježeg povrća i voća, koja ne zahtjevaju neku posebnu pripremu i termičku obradu. Po principu, što brže za pripremu, a što korisnije za organizam. To su salate definitivno. Makar sam ja u takvom raspoloženju.

Pa sam se opredijelila za par mojih omiljenih, vjerujem da će vam se kombinacije ukusa dopasti.

Ljetnja salata sa mangom

Za pripremu vam je potrebno:

1 mango

100gr pečenog, neslanog kikirikija

1 glavica crnog luka (ja koristim crveni, crmnički)

50 gr svježe rukole

Himalajska so, maslinovo ulje

Priprema:

Mango se isjecka na kockice, crni luk takođe (može se koristiti i mladi luk), doda se izmrvljeni kikiriki (možete ga mrviti na krupno u sjeckalici) i rukola, so i maslinovo ulje i salata je spremna za konzumaciju.

Salata sa lignjama i ljutim papričicama

Za pripremu vam je potrebno:

2 crvene ljute papričice

1 limun

3 čena bijelog luka

200 gr lignji

Struk svježeg peršuna

Himalajska so, maslinovo ulje, biber

Priprema:

Na maslinovom ulju, svega 1-2 min,  propržiti ljute papričice, bijeli luk i izrendanu koru limuna. Potom dodati lignje, očišćene i isjeckane na kolutiće. Kada se sve lijepo proprži, dodajete začine, sok limuna i isjeckani svjež peršun.

Salata se služi topla. Odlično ju je kombinovati uz čašu hladnog bijelog vina.

Ljetnja salata sa dinjom i mocarelom

Za pripremu vam je potrebno:

4 kriške dinje (pipuna)

100gr mocarele (može i feta)

50 gr pršute (odlično se slaže ukus pršute sa pipunom)

50 gr svježe rukole

50 gr sušene brusnice

Himalajska so, maslinovo ulje

1-2 kašike domaćeg meda

1 limun

Priprema:

Pipun isjeckati na kocke, sir i pršut takođe. Dodati rukolu, izmiješati sve sastojke i dodati dresing.

Dressing pravite od 1-2 kašike domaćeg meda, 3kašike maslinovog ulja i soka cijelog limuna.

Salata se služi hladna. Obzirom na rapsodiju ukusa koji u njoj preovladavaju i bogatstvo sastojaka, salata može poslužiti kao obrok. Idealna je uz krišku hljeba od cijelog zrna (po mom ukusu hljeba od 100% čiste heljde).

Ova količina je idealna kao obrok salata za dvije osobe.

Hladna salata sa lebleblijom i patlidžanom

Za pripremu vam je potrebno:

2 patlidžana

2 glavice crnog luka

150 gr kuvane lebleblije (ili konzervirane)

Čaša kiselog mlijeka

Struk svježe nane (može i svjež peršun, kao zamjena)

50gr svježe rukole

Himalajska so, maslinovo ulje, biber

Priprema:

Patlidžan se isjecka na kocke, kao i crni luk i griluje. Dodati himalajsku ili morsku so, biber, preliti sa malo maslinovog ulja. Dodati leblebliju. Ako koristite konzerviranu potrebno ju je isprati pod mlazom vode, pa umješati sa ostalim sastojcima. Ako sami pripremate leblebliju, potrebno ju je potopiti u vodi bar 6 sati prije kuvanja. Kuvati nekih sat vremena, dok ne omekša. Isprati pod mlazom vode i dodati u preostalu smjesu.

Dressing pravite od jedne čaše kiselog mlijeka i isjeckane nane.

Kada lijepo sjedinite sve sastojke sa dressingom, dodajte sjeckanu svježu rukolu.

Salata se ohladi u frižideru, konzumira se hladna.

Ova količina je idealna kao obrok salata za dvije osobe.

Ako budete pravili ove salate pišite mi kako vam se dopadaju. Ukoliko ih budete stavljali na Instagram, molila bih vas da koristite hashtag #healthymoodme.

 

Prijatno!

S ljubavlju,

Ivana

 

 

Sviđa ti se post? Podijeli ga sa drugima!

Leave a Reply

Your email address will not be published. Required fields are marked *