fbpx

Kako do najboljih rezultata: pravilna ishrana u 4 postulata

Piše:
Ivana Gojković,
Mr ph. spec. | Health Coach

Piše:
Ivana Gojković,
Mr ph. spec. | Health Coach

Volim da posmatram naš grad u posljednje vrijeme. Graja na ulicama, u parkovima i teretanama mi govori da je zaista došlo vrijeme buđenja. Sve više je mladih ljudi zaluđeno sportom, količina ljudi u jutarnjim terminima u teretani je frapantna, ulice su pune trkača, sve više je ljudi koji pomjeraju svoje granice i pripremaju se za maraton, polumaraton, triatlon…. 
Čak i oni koji nikada nisu rekreativno konzumirali sport sada su aktivni.
Ako želiš da stvarno proširiš sopstvene granice, uzmeš najbolje od fizičke aktivnosti, poboljšaš vitalnu energiju, brže dođeš do cilja, nemoj zaboraviti na pravilnu ishranu. Bez ovog najvažnijeg segmenta svaka akcija je nepotpuna. 
 
Saznaj koja su to četiri osnovna postulata pravilne ishrane, sigurna sam da ćeš dobiti potrebnu inspiraciju:

1. Ne opterećuj se brzim rezultatom.

Dijelim mišljenje da je ovo najveći izazov. Naučeni smo da sve što radimo radimo sa velikom količinom očekivanja. Ako treniram očekujem da moja figura izgleda savršeno. Ako sam na bilo kakvoj restrikciji očekujem da ugledam idealnu broju na vagi. Ako nije tako onda je propast svijeta. Onda ništa ne vrijedi, zašto se uopšte i dajem? …koliko sam samo puta ovo izgovorila.

Međutim, svaki put kada se vezujemo za rezultat on izostaje. Zašto? Zato što duboko u nama vibriramo nemanje, a nemanje samo nemanje može privući. U životu nailazimo stalno na potvrdu naših uvjerenja. Zato dragi moji, mijenjajte uvjerenja!

2. Idealna ishrana: pronađi svoju

Nisam pobornik nikakvih unificiranih planova i programa ishrane. Svako vrijeme promoviše neki određeni stil ishrane, to je više stvar trenda nego potrebe. Keto ishrana odnosno keto dijeta, kao low carb ishrana / dijeta zauzimaju svoju poziciju u sadašnjoj eri. Obje promovišu redukovan unos ugljenih hidrata (šećera u svim njegovim oblicima). 

Do skoro je bila na snazi hrono dijeta, paleo dijeta…. Dobro poznajem gotovo svaku od pomenutih. Većinu sam probala, da bih vidjela kako moj organizam funkcioniše, a o svim načinima ishrane sam učila. Zato volim koncept koji zastupam, (Health coaching) jer ništa ne promoviše, svačiji izbor poštuje,  a svemu što podržava daje personalizovanu notu.

Ne postoji univerzalan plan ishrane koji radi za tebe i za mene. Svaka od ovih ishrana je naučno potkrepljena, svaka radi posao u nekoj mjeri i daje određeni rezultat. Dokle? Najčešće samo dok ste na određenom režimu. A šta kasnije?

Sve ono što vas frustrira, sve ono gdje sebe dugoročno ne vidite nije za vas.

Stvari treba posmatrati dugoročno. Sve što ne posmatramo tako daje brz rezultat, ali još brži jo-jo efekat.

Kako ćeš znati da je neka ishrana dobra za tebe?

Tako što te ne muči pomisao na obrok, zato što taj način ishrane za tebe nije dijeta već stil života, tako što imaš pregršt energije u sebi, tako što ti stomak nije naduven, tako što tvoja koža naprosto blista,  tako što sa radošću pripremaš svoju hranu, tako što znaš da na ovaj način ulažeš u sebe i svoje zdravlje. Tako što si svojim izbor najbolji primjer ljudima oko sebe.

Ako ti je za pronalaženje tvog “idealnog” plana ishrane potrebna pomoć uvijek se možeš obratiti stručnom licu.

3. Uobroči se

Jako je važno da obroke imamo u približno isto vrijeme u toku dana. Zašto?

Da bi nam tijelo normalno funkcionisalo potrebno mu je obezbijediti odgovarajuću količinu hrane u odgovarajuće vrijeme.

Nije isto ako tijelu damo kiflu iz pekare ili neki zdraviji obrok. Da odmah razbijemo jedan od mitova: u oba slučaja vaše tijelo će dobiti kalorije. Zdrava hrana nije hrana koju možete jesti u neograničenim količinama, a da se ne odrazi na vašu figuru. Svaka hrana ima kalorije, ali razlika je u kvalitetu kalorija. Nije isto dati tijelu “prazne kalorije” izborom peciva koji je najčešće veoma siromašan nutrijentima i recimo neku ovsenu kašu koju ste u kućnim uslovima pripremili.

Zdrava, umjerena i pravovremena ishrana tijelu daje onoliko hranjivih materija koliko mu treba u momentu kada mu treba, pa nije potrebno da tijelo stvara rezerve masti. U suprotnom, tijelo ćete naučiti da se “bori za opstanak” tako što će koristiti svaku priliku da višak energije iz hrane (koju ne potroši) upotrebi za masne rezerve.

To su oni primjeri ljudi koji imaju jedan obrok dnevno i u čudu su kako ne mogu korigovati svoju tjelesnu masu kada tako malo jedu.

4. Pravilno kombinuj hranu

Pogrešne kombinacije hrane su jedan od najčešćih uzročnika nemogućnosti korigovanja tjelesne mase. Te “male greške” koje pravimo nisu odmah vidljive, ali na nivou organizma najčešće prave ozbiljne opstrukcije.

Izuzetno loša kombinacija je obrok koji sadrži više različitih izvora proteina. Dakle, treba izbjegavati kombinaciju orašastih plodova i mesa, sira i jaja, mesa i mliječnih proizvoda, sira i orašastih plodova…u istom obroku. Svaka proteinska naimrnica zahtjeva različitu količinu sokova za varenje, kao i različito vrijeme njihovog lučenja.

Svaki obrok koji sadrži loše kombinovane namirnice se vari i do 8 sati.

Možete li samo da zamislite koliko hrane istruli u želucu zbog nemogućnosti adekvatnog varenja?

Namirnice bogate skrobom i šećerom su loša kombinacija. Na primjer, ukoliko u istom obroku kombinujete džem, med i slatko voće sa žitaricama, hljebom, krompirom i sl., doći će do procesa fermentacije. Da li vas ovo iznenađuje?

Voće ne treba jesti nakon obroka, već minimum pola sata prije obroka- najbolje ujutru na prazan stomak. Voće posmatrajte kao obrok, nikako kao dodatak vašem glavnom obroku, ili dezert.

Uz obroke koji sadrže koncentrisane proteine treba jesti što više svježe salate. Povrće znatno olakšava varenje teško svarljivih proteina. Npr. Idealna kombinacija bi bio biftek sa zdjelom svježe salate. Nikako biftek u mliječnom sosu, sa aromatizovanim krompirom.

Kombinacija žitarica i soka od narandže nije tako dobra kombinacija, iako se svuda promoviše kao zdrav obrok. Kiseline u soku od pomorandže snižavaju aktivnost enzima koji razgrađuju ugljene hidrate.

Još jedna loša kombinacija, često promovisana kao zdrava i idealna, jeste kaša sa jogurtom i bobičastim voćem. Proteini iz jogurta u kombinaciji sa kiselim voćem smanjuju probavna vlakna, stvaraju toksine i mogu prouzorkovati alergijske reakcije.

Vodu ne treba piti tokom jela, niti odmah nakon istog (idealno je 20min prije obroka, ili 3-4 sata nakon obroka). Voda se dobro kombinuje sa medom, ili svježim voćem.

Pravilno kombinovana hrana pozitivno utiče na naš metabolizam, što nam stvara osjećaj lakoće, redovnog pražnjenja i izostanak nadutosti. Osim toga znate da svaka opstrukcija u procesu probave stvara “lažnu sliku” naše figure. Svaki put kada imamo problema sa probavom mi imamo utisak da smo teži. Zar ne?

Na putovanju do idealne brojke na vagi puno je stanica koje moramo proći. Neke prođemo lagano, bez zadržavanja, dok neke zahtjevaju više energije i vremena. Kako je naš izgled samo manifestacija našeg unutrašnjeg stanja, mi zapravo radom na kilogramima radimo na sebi i svom mentalnom, emocionalnom i fizičkom zdravlju, na onaj najsuptilniji način.

Dobij inspiraciju za svoje obroke, moje zdrave recepte, besplatne male savjete u vezi zdravih stilova života i drugog kvalitetnog health coach sadržaja direktno u svoj inbox.